|
یازار: پروین قاسمی ناغیل: گؤروش... حیطده جورلادیغیم قار آدامینا باخدیم. سحر بو قارلا نئجه آغانی گؤرمه یه گئده جه ییم فیکریمی توتوب بوشلامیردی  اوره ییم یئرینی تانییا بیلمیردی اوتورسون.دؤینوتوسو آغاج دلن قوش کیمی بئینیمی دلیردی.آرا بیر حؤولودن دوداقلاریمی سانکی پاییز کوله یی اسدیریردی.یوخو گؤزومده یادیرغیلاییردی.آنام ترپندیکجه ،دئییردیم بلکه منی گؤرورو و ایندیجه سسینی باشینا آتیب دئیه جک: - زاهرا آز چوبالا قیز ،داها یات دا. -آتامین خورولتو سسی اوتاغیمیزی آغزینا آلمیشدی.آغانین گلیش خبری دؤوره می ائله دولدورموشدوکی، گلین بالاما اؤنجه سئریدی کی، یاتاغیمدا یئر اولمادی و آیری یاتدی. پالتار آسقینین دیوارا دوشن شؤیگه سی، گؤزومه یئکه قورخونج بیر آدام گؤرونوردو. قارانلیق اوسته گؤز ایشغیملا، باخیشیم آراسی ،آغانین شکیلین چکیردیم .گاه بؤیوک آتاما اوخشادیردیم، گاه مچیدین موللاسینا اوخشادیردیم .گاه.... او آن گؤروش حسرتین او قده ر یئییب تؤکودوم کی، داها دیشلریم کال اولموشدو.دئییردیم کاش بیزیمده کندیمیزده شه هرده کیلر کیمی تئلویزییا اولایدی. اولسایدی بلکه منده آغانی اوردا گؤره ردیم.اوستو باشیم آچیق قالمیشدی. سویوقدان آغاج کیمی دوز قوروموشدوم. بیردن دوروب سو کیمی پنجره قاباغینا سیچیرادیم و پرده نین اوجونو قالدیریب، حیطده جورلادیغیم قار آدامینا باخدیم. سحر بو قارلا نئجه آغانی گؤرمه یه گئده جه ییم فیکریمی توتوب بوشلامیردی. چکمه لریم آش سوزن سایاق دلیک دئشیکیدی. آمما آیاق یالیندا گئتمه لی اولسا ،گئده جه ییمین زوروندایدیم.اوره ییمه گلیردی کی ،نه اولاردی اوزاق یئردن کنده گلنلر ،ائوه گله لر.کاش مچید قاباغیندا ،ییغیناجاق قورمایالار. بئله اولسایدی، منده گئده نده اوشومزدیم.آمما منلیک دئییلدی کی.کنده گلنلرهمیشه مچید قاباغیندا دانیشیرلار و آغانیندا گلیشینده، گره ک مچید قاباغینا ییغیشالار.گئجه اؤزونو یاری بؤلوردو و هله ده یوخو گؤزومدن گولشیردی. پرده نی توپلاییب، سول طرفه ییغدیم. قارین ایشیغی اوتاغیمیزا سانکی آغ گچ چکیردی.آنام اوتاغین اِئنیه یاتمیشدی،آتام اوزونونا.شاختا پنجره دن کئچیب مندن یاپیشیب تیتره تدی. دیشلریمی بیر بیرینین جانینا سالدی.تئز قاچیب یورغانیمین آلتینا گیردیم .بهمن...بهمن... کاش آلتی یاشلی بیر زاهرا آدلی قیزین آدی بهمن اولایدی اودا من اولایدیمین آرزوسو، منی قوجاقلاییب قیزیشدیردی.آتام هر ساعات مچید قاباغیندان رادیوسو اولوب قولاق آسانلاردان خبر گتدیکلری اوزره بهمنین اوولیندن قولاغیم سسده گؤزوم یوللاردا قالمیشدی. اؤزومدن سوروردوم نییه آغا ایندی گلیر؟بورا کیمی هاردا قالمیشدی؟شاه هارا قاچیب؟بو سویوقدا هاردا یاتیر؟ یانی چوخ- چوخ پیس آدامدی؟آنام دئییر: دونیادا هامیدان پیس آدامدی.نییه مکتبلرینده یاخشی اولماغی اونا اؤیره تمه ییبلر ؟ بو سوواللارا جاواب تاپینجا ،آنامین اَللری اوزومه چکیلدی-دور نازیم، دور قیزیم، دور زاهرام ،بوگون انشا... آغا گله جک، شیرنی یئیه جه ییک. - فانار کیمی بیردن آیاق اوسته توللاندیم. اَلیمی اوزومو یوماغا قاچدیم. قار گؤزومو ائله قاماشدیردی کی ،کیپریکلریم بیران چپیک چالدیلار.سحرین شاختاسی تئز توو،آغزیما بورنوما دولوردولار. آفتابانین بوزلو سویوندان بیر اوووج اوزومه چیرپدیم،سویوق سو اوزومه سانکی اینه باتیریردی.تئز آیاغیمی گؤتوروب ائوه قاچدیم. اؤزومو آز قالیردیم پیچین ایچینه تپه م.بیراز قیزیشاندان سونرا داراغی گؤتوروب، ساچیمی آراق واراق ائیله ییب ، لئچه ییمی اؤرتدوم و صوبحانه یئمه یه اوتوردوم .آتام اَلین باشیما چکییب دئدی: -به به قیزیم بوگون لاپ آغاجدا یاتمیشیمیش.واختلی دوروب، اونا گؤره ده، سالام سحریز خیر یادیندان چیخیب. - باشیمی یئره سالیب ،گؤزومو سوفرانین اورتاسینداکی قیرمیزی گوله تیکیب اوتاندیم. بیر تیکه کؤکه دن کسیب،بیر قورتوم چاییمدان ایچدیم. .پالتار آسقییا ساری آتیلیب، کاموا کوتومو گؤتوروب گئیدیم. آنام سوردو- هارا بالا ؟ اوزاق گئتمه ها، اینده گئده جه ییک مچید قاباغینا شیرینی یئیه ک. - قار آدامیما باش چکیرم دئییب، چؤله قاچدیم لئی کیمی یولو اَلیمه آلیب، مچید قاباغینا هؤوله سک قاچدیم.آغا جیبینده کی شیرینیلری پایلار منه قالماز دئیه: آددیملاریمی، قاری یاریب گئتمه یه، لاپ یئکه لدیردیم. آیاغیم شاختادان دیله گلیب سیزیلداییردیلار.اَللریم اؤزونو گاه آغزیما ،گاه جیبیمه سوخوردو. سویوق بورونوماکئچیب، قیزیشیب آغزیمدان چؤله تؤکولوردو. اوزاقدان گؤزومه ساتاشیردی کی ،هامی توپلاشیبلار و اوره ییم قورخودان آتیلیردی کی ،آغانی هامی گؤرورب، من دالی قالمیشام.قاری بولدیزئر سایاق قاتلایا- قاتلایا مچید قاباغینا یئتیشدیم.آغیزدان چیخان سؤزلر، بیلینمیردی کیمین قولاغینا کئچیر.هامی دئییب گولوردو.سئفی عمیم دئدی: - گؤردوز؟دئمه دیم بوکیشینی من تانییرام پیروز اولاجاق؟دئمه دیم شاهین نکوارینی باشینا چئویره جک؟ - قوجا خلیل دئدی: هه بالا تؤکولن قانلارین قیصاصی قالمازدیکی. ایگیدلیک داشی هاردان دَیسه اوردان اویدورار بالا. - -بو آن اوشاقلارین اویونلاریندان، بیر قارتوپو اللریندن قورتاریب، تانگ توپو سایاق، گلیب دوز گؤزومه توخاندی.اوشاقلار قاه- قاه ووروب گولوشدولر.گؤزومون آغریسی یاناغیما تؤکولدو.خاتین خالا دئدی: قیز به آنان هانی؟-دئدیم: گله جک. کوبرا خالا دئدی: - کاش موللا منبره چیخمامیش گله مچیدده بیرگه اوتوراق . -گؤزلریم هر آن کؤروپو اوستونه دولانیردی کی، گؤره سن آغا آتلا گله جک؟ دَوه یله گله جک؟ یوخسا شه هرده کی جیپله گله جک؟یولون لاپ اوزاقلارینا گؤزلریمی گؤزتچی قویموشدوم. هله هئچ بیر قارالتی گؤرونموردو.اوره ییمده یاواش -یاواش پیچیلداییردیم کی کاش منه او شه هرده ساتیلان قیرمیزی سورمادان گتیره. داها آیاغیم سویوقدان دیله گلدی. آز قالیردی قوجاغیما گیرسین. - زئیناب خالا منی گؤرجک دئدی: بورداسان اؤلموش؟؟ جین کیمی هاچان گؤزدن ایتیبسن؟ اؤز باشینا قودوق.هئچ بیلیرسن یازیق آتانلا آنان ،سنی نه واختی گزیرلر؟ دئییرلر بلکه، ایت قورد آغزیندا گئدیبسن.تئز آتیل قاپیزا گؤرسونلر، اوره کلری یئرینه دوشسون -جین کیمی قاچیب بهداشتین دال دیوارینین دالیندا گیزله ندیم. آغا گلر گئده ر گؤرمرم دئییب، اورا بورانی گؤزدن کئچیردیردیم. اوزاقدان گؤردوم ،آنام گیل اَل آیاقلارین ایتیرمیش گلیرلر. قورخونو قورتوم- قورتوم اودغونوردوم. آنامین گؤزلریندن قار کیمی حیرص یاغیردی .باشیمی آنامین یئکه اَللرینین، قاپازینا حاضیرلاییردیم. آتامین چپ -چپ باخماسینا ،گؤزوم قیرپیلیردی.اونلار منه یئتیشنده، مچیدده کی رادیونون سسی، بیلندگو دان یئری گؤیو بورودو. -"بسم الله الرحمن الرحیم... امام آمد... امام آمد... ملت شریف ایران، به اطلاع میرساند .هم اکنون... دوازدهم بهمن ماه سال ۱۳۵۷ ،ساعت 27/9 دقیقه صبح ،امام خمینی وارد ایران شد " -و ...هامی اَل چالدی، فیش چالدی ،قیشقردی، و.... بیر شکر چؤره یی گؤیدن، قار دنه سیله قول بویون، گلیب باشیم اوسته دوشدو
نظرات بینندگان این خبر فاقد نظر می باشد نظر شما
طراحی وب سایت آریایک توسط aryanic highportal aryanic
|
|
تمام حقوق مادی و معنوی این سایت متعلق به موسسه هویت و مهدویت مشگین شهر است و استفاده از مطالب با ذکر منبع بلامانع است. ((طراح : صفری ))
|